Rückblicke

2020

Konzärt und Theater

Wieder einisch meh, hei mir 5x dörfe im volle Saal vom Restaurant Dänkmal, Bramberg singe und Theater spiele. Es isch grossi Fröid gsy, so tolls Publikum z'ha. Mir danke allne Bsuecher und Bsuecherinne für die grossi Ungerstützig.

2019

Loupemärit 8.11.2019

Wenn s'Öfeli iigheizt wird, isch Märitzyt und de schmöckts wieder e Tag lang nach feine Waffle. Härzliche Dank für öie Bsuech und d'Ungerstützig vo üsem Chor am Loupemärit. Schön, dass Dir öich trotz em chüele Wätter usegwagt heit!

Und danke allne ChörlerInne, wo g'chüechlet und bache hei u wo dr Stand hei gschmisse! Es isch alles nid sälbstverständlich!

Jubilarinnen 25.10.2019

Alässlich vo dr Delegierteversammlig vor Chorvereinigung Seeland sy 4 vo üsne Froue für ihre jahrelang IIsatz im Chorsinge gehrt worde. Mir gratuliere ganz härzlich und danke öich, Rosmarie, Therese, Ruth und Marlis, für öiies Engagement und öii Tröii üsem Chor gägenüber.

80. Geburtstag von Rolf Wyssmann, 17. Septämber 2019

Üsi letschti Prob vor de Herbschtferie isch ganz bsungrigs gsy.

Mir hei üsem Mitglied, Rolf, dörfe zum 80. Geburtstag gratuliere und sy vo Rolf und Vreni köschtlech bewirtet worde. A dere Stell ganz härzliche Dank für dä schön Abe! E settigi "Prob" het me de sälte.

Mir wünsche em Rolf Wyssmann gueti Gsundheit und wyterhin grossi Fröid am Singe mit üs.

Junibummel, 18. Juni 2019

Bi schönem Wätter sy mir vom Burgerhüttli Loupe zum Schloss abe bummlet. Dert het üs dr Fritz Marschall sachkundig und läbändig d'Vergangeheit vo däm gschichtstächtige Bou nöcher bracht. Nach ere guete Stund sy mir de wieder bärguf, wo bym Hüttli e feini Verchöschtigung uf üs gwartet het. Dr Bruno Freiburghaus het das Apéro zu sym 10-jährige Präsidente-Engagement spändiert.

Härzliche Dank geit a Fritz Marschall für d'Füehrig und a Bruno, darfsch gärn no chly üse Präsi sy, nid nume wäg em Apéro....

Es isch sehr gmüetlich gsy.

Pfingschtgottesdienscht, 9. Juni 2019

Einisch meh hei mir dörfe am Pfingschtgottesdienscht singe. Mir hei d' Lieder Frühlingsjubel, Tebe Poem und La sera sper il lag gsunge. Schad hets grägnet, s'feine Züpfeapéro wär vorusse no viel schöner gsy.

mittelländisches Schwingfescht 29. Mai bis 2. Juni 2019

Mir gratuliere em OK Schwingfescht zu däm tolle Erfolg. Mir hei Fröid gah, e Teil vo däm Alass chönne z'sy, sygs als Gascht oder mit Uftstelle, Abrume, Vorbereite, Särviere, Sandwich stryche, Dekoriere, Bediene und so wyters. zur Websyte mit Föteli und Filme

17. Mai 2019, Loupemärit

Es het üs gfröit, dass dir wiederum so zahlrych a üse Stand in Loupe syt cho. Danke viumal für öii Ungerstützig und ja, wär Glück het gah, het sogar üses jüngschte Mitglied chönne bim Wafflebache erläbe. Mir sy so stolz, dass ou jungi Lüt dr Wäg uf e Brambärg finge. Sie tüe üsem Chor so guet!

S'nächscht Mal heize mir am Herbschtmärit wieder ii.

20. April 2019, Chorjubiläum

Im chlyne, aber wunderschöne Rahme het üse Chor am Samschtig, 20. April, sy 75jährig Geburtstag gfyret.

Bim ne feine Ässe im Restaurant Denkmal Brambärg und i gmüetlicher musikalischer Stimmig hey mir üses "zäme Liede und üsi gueti Kameradschaft" no grad e chly chönne feschtige.

Bsunders Fröid hei mir gha, dass eis Gründigsmitglied unger üs isch gsy, wär kennts nid, s' Änneli Badertscher.

Mir sy stolz uf zahlrychi langjährigi Mitglieder und hei ou grossi Fröid a dr Verjüngig vom Choraltersdurchschnitt dür üsi nöie Mitglieder. Das git üsem Chor e ganz bsunderi Mischig.

Mögi d'Fröid am Singe dr gmischt Chor Brambärg no mängs Jahr am Läbe erhalte!

2. April 2019, Hauptversammlung

A üsere Houptversammlig hei mir 3 Nöimitglieder ufgnoh und heisse die drü Froue rächt härzlich willkomme bi üs:

Bettina Dolfi, Sopran

Gina Isabel Jäger, Sopran

und Salome Riesen, Alt

2. - 15. Februar 2019, Konzärt und Theater

Zwüschem 2. und 15. Februar 2019 hei mir wiederum im usverchoufte Brambärgsaal dörfe üses Konzärt und Theater vorfüehre. Mir danke öich ganz härzlich für öie Bsuech und öii Ungerstützig. Ou dr Familie Wyssmann und Hanke mit ihrem ufgstellte Serviceteam danke mir für d'Gaschtfründschaft!

Und äbe, Dir wüsst ja:

"Bis zum nächschte Mal, wes de wiederum heisst, Konzärt und Theater mit em Gmischte Chor Brambärg!"

2018

18. Dezämber 2018, Chor-Wiehnachte

Mir hei e gmüetliche Abe im Platzgerhüsli im Ursprung verbracht. Raclette, Tee, Wy, Säuberbachnigs, Liedli u Gschichtli - so hei mir das Jahr beändet.

24. Novämber 2018, Singe im Betagtezäntrum, Laupen

Mit eme bunte Liederstruss, hey mir e Farbtupfer i s'Betagtezäntrum bracht. Es het üs sehr gfröit, dass so vieli Lüt sy cho lose!

9. Novämber 2018 Herbschtmärit Loupe

Danke allne Bsuecher vo üsem Stand am Loupemärit. Mir hey wiederum es grosses Sortimänt Säuberbachnigs und feini Waffle vom Holzöfeli chönne abiete. Sogar s'Wätter het mitgspielt. Mir fröie üs, öich ou im nächschte Mai wieder dörfe z'bediene.

26. Auguscht 2018, Empfang vo de Hornusser uf em Brambärg

Mit grosser Fröid het e Delegation vo üsem Chor mit angerne Vereine zäme d'Hornussergsellschaft empfange, wo am Eidgenössische z'Walkringe isch gsy.

Mir gratuliere zu ihrem Erfolg ou uf däm Wäg ganz härzlich.

18. Auguscht 2018, Chorreis nach Basel

Bi schönschtem Wätter het üs dr Matthias Badertscher mit em Car übere Houestei nach Basel a s'Dreiländer-Eck gfüehrt. Dert hei mir s'Fahrzüg gwächslet und sy mit em Mittagsschiff - uf ne Schleusefahrt. Später hei mir dörfe e süesse Iiblick i d'Läggerli-Fabrigg tue. Vieli Lieder, Diskussione und Lacher hei mir i üsi Erinnerigs-Chischte chönne tue. Danke am Marcel Wehrli fürs Organisiere, es het so gfägt!

7. Auguscht 2018, Chorbrätle

Mir hei üs zum traditionelle Brätle nach de Summerferie troffe. Bi schönschtem Wätter hei mir e gmüetliche Abe verbracht. Danke am Platzgerverein Ursprung und speziell am Rolf Eggli fürs Brätle und für üs dasy.

19. Juni 2018, Maibummel

Dr Maibummel isch e Junibummel worde - aber wättertechnisch het sich das glohnt.

Mir hei dörfe dr Sideroupebetrieb in Bärfischehuus besichtige. E ganz Iidrückliche Abe isch das gsy und mir danke em Reto und dr Ursula mit ihrem Team für dä härzlich Empfang und dä gmüetlich Abe uf ihrem gast&hof!

Wär's nid kennt, mues es gseh - wär's kennt, geit gärn wieder häre.

interessanti Füehrig mit dr'Ursula und em Reto

uf em Muulbeeriboumfäld - s' Fuetter für d'Sideroupe

e guete, dir flyssige, wärtvolle Tierli!

Pfingschtsunntig 20.05.2018

Mir hei traditionel am Pfingschtsunntig-Gottesdienscht mitgsunge, aber nöi isch gsy, dass üs d'Marlies Gerteis het dirigiert. Danke vielmal für dy Iisatz Marlies!

Loupemärit 18.05.2018

Mir säge härzlich Danke allne, wo üs am Stand in Loupe bsuecht hei - üser feine Waffle vom Holzfüür, d'Schlüüferli, d'Brätzeli und alli andere Bachware sy ou das Mal wieder bsunders guet aacho.

Muettertagskonzärt 14.5.2018

Härzliche Dank allne Bsuecher vom Gmeinschaftskonzärt mit dr Musikgsellschaft Nöienegg. Mit hei grossi Fröid gah!

us dr Houptversammlig vom 3.4.2018

Härzlich Willkomme

Therese Seelmann us Loupe als Mitglied i üsem Chor!

Konzärt und Theater 2018

Mir bedanke üs ganz härzlich

bi üsem grosse Publikum für e Bsuech

am Konzärt und Theater.

Es het wiederum viel Spass gmacht.

2017

Chorwiehnachte

19. Dezember 2017

Nochmals kamen wir in diesem Jahr zusammen, um das Jahr weihnachtlich ausklingen zu lassen. Bei Raclette sassen wir gemütlich beisammen.

Liederkläng im Altersheim

25. November 2017

Wir durften den Seniorinnen und Senioren im Landhaus Neuenegg einen musikalischen Blumenstrauss darbieten.

Laupenmärit

10. November 2017

Herzlichen Dank allen Besuchern an unserem Waffeln- und Backstand am Laupenmärit!

mir hei müesse Abschied näh...

Am 25. Oktober haben wir unser langjähriges Aktivmitglied, Vreni Blaser, in der Kirche von Neuenegg mit ihren Lieblingslieder verabschiedet. Wir sind betroffen und traurig.

Chorreis i Jura

2. September 2017

Lac de Joux, Absinth-Brennerei, mit Regen, aber trotzdem bester Laune!

Chor-Brätle

8. August 2017

Zum Einstieg nach den Sommerferien trafen sich die Mitglieder mit ihren Partnern zum gemütlichen Beisammensein und Grillieren bei der Platzgerhütte im Ursprung.